Заказ
бiлетаў:

  • +375 (176) 55-55-55 — гарадскi
  • +375 (29) 175-27-84 — вэлком
  • +375 (29) 853-27-84 — мтс
kvitki.by

7360

iнфармацыя
i заказ бiлетаў

Навiны

Нацыянальны конкурс маладых выканаўцаў беларускай эстраднай песні

        Разам з фестывалем беларускай песні і паэзіі “Маладзечна-2017” адбудзецца і Нацыянальны конкурс маладых выканаўцаў беларускай эстраднай песні. Сустрэчы з маладымі артыстамі адбудуцца 2 чэрвеня ў 12.00 у Палацы культуры, а ў 17.00 і 21.30 – у Амфітэатры.
        З першага фестывалю, які прайшоў у 1993 годзе, адной з галоўных падзей праграмы традыцыйна застаецца конкурс маладых выканаўцаў. Нязменнымі з’яўляюцца і яго мэты: далучэнне да нацыянальных каштоўнасцей беларускай культуры, прапаганда роднай мовы і папулярызацыя твораў беларускіх кампазітараў і паэтаў, раскрыццё і падтрымка маладых талентаў.
        Па традыцыі, конкурс праводзіцца ў тры этапы: першы (раённы, гарадскі) і другі (абласны, Мінскі гарадскі) з’яўляюцца адборачнымі і праводзяцца аддзеламі і галоўнымі ўпраўленнямі ідэалагічнай работы, культуры і па справах моладзі, а трэці (рэспубліканскі) з’яўляецца заключным і праводзіцца Нацыянальным акадэмічным канцэртным аркестрам Беларусі падчас Нацыянальнага фестывалю беларускай песні і паэзіі. Да ўдзелу ў трэцім этапе конкурсу кожная вобласць і горад Мінск накіроўваюць па тры маладых выканаўцы ва ўзросце ад 16 да 31 года, якія пастаянна пражываюць на тэрыторыі Рэспублікі Беларусь.
        Сёлета ў Маладзечна прыедуць маладыя артысты, якія прафесійна займаюцца вакалам з ранніх гадоў, амаль усе маюць музычную адукацыю і з’яўляюцца актыўнымі ўдзельнікамі шматлікіх канцэртных праграм, дабрачынных мерапрыемстваў, лаўратамі рэспубліканскіх і міжнародных конкурсаў і фестываляў. Выступленне на маладзечанскім фестывалі яны лічаць для сябе поспехам, а працу з Заслужаным калектывам “Нацыянальны акадэмічны канцэртны аркестр Беларусі” пад кіраўніцтвам народнага артыста Беларусі, прафесара Міхаіла Фінберга – выдатнай школай прафесійнага майстэрства. Лепшых канкурсантаў, а таксама ўладальніка спецыяльнага прыза імя Уладзіміра Мулявіна – крышталёвай гітары – вызначыць журы.
Жадаем усім канкурсантам поспехаў і ўдалага выступлення, а вам, паважаныя чытачы, прапануем бліжэй пазнаёміцца з маладымі артыстамі.

         Брэсцкая вобласць

         Кацярына Сычэўская – рэжысёр заслужанага аматарскага калектыву Рэспублікі Беларусь тэатра эстрады “Капелька” Мірскага дома культуры. У 2014 годзе скончыла Беларускі дзяржаўны ўніверсітэт культуры і мастацтва.
Прымала ўдзел у розных конкурсах і фестывалях і дасягнула высокіх творчых вынікаў. Двойчы станавілася ўладальніцай заахвочвальнай прэміі спецыяльнага фонду Прэзідэнта Рэспублікі Беларусь па падтрымцы таленавітай моладзі.
         Юлія Логвін у 2014 годзе ўжо прымала ўдзел у конкурсе маладых выканаўцаў у Маладзечне. Юлія скончыла Брэсцкі дзяржаўны музычны каледж імя Р. Шырмы па класе “Эстрадныя спевы”. Займалася ў народным тэатры “Зеркало”. Зараз супрацоўнічае з Белавежскай дзіцячай школай мастацтваў, дзе выкладае тэатральную гульню.
У рэпертуары спявачкі песні на рускай, беларускай, украінскай і англійскай мовах. З’яўляецца лаўрэатам шматлікіх абласных конкурсаў і фестываляў.
         Аляксандра Гесь – салістка заслужанага аматарскага калектыву Рэспублікі Беларусь тэатра эстрады “Капелька”. Вучыцца на другім курсе Баранавіцкага дзяржаўнага музычнага калежда.
Яркая і эмацыйная спявачка неаднаразова была пераможцай рэспубліканскіх і міжнародных фестываляў, конкурсаў і творчых праектаў. У складзе вакальнай групы “Акварель”, а таксама сольна прымала ўдзел у Фестывалі Саюзнай дзяржавы “Творчество юных”.

         Віцебская вобласць

         Вольга Мазго навучэнка 2 курса Віцебскага дзяржаўнага каледжа культуры і мастацтваў па спецыяльнасці “Харавая музыка”.
Творчая біяграфія маладой спявачкі налічвае шмат розных фестываляў і конкурсаў. Вольга актыўная ўдзельніца канцэртных праграм Віцебска і вобласці, мае разнапланавы рэпертуар з народных песень, твораў беларускіх аўтараў, кавер-версій з рэпертуару папулярных выканаўцаў.
         Юлія Кудлакова спяваць пачала з 2008 года ў народнай студыі эстрадных спеваў “Креатив”. За час заняткаў у студыі Юлія дасягнула высокіх вышынь. У яе творчай скарбонцы перамогі ў конкурсах міжнароднага, рэспубліканскага і абласногаўзроўняў. Маладая спявачка мае досвед працы з Jazz Band, любіць імправізаваць, прымае актыўны ўдзел у гарадскіх, раённых і абласных мерапрыемствах як сольная выканаўца, так і ў складзе вакальнага ансамбля.
        Юлія Латковіч з 2002 года была салісткай дзіцячай вакальнай студыі пры Першамайскім аддзеле Дэпартамента аховы г. Віцебска МУС Рэспублікі Беларусь, а з 2005 года стала салісткай ВІА “Вікторыя”.
Атрымоўвала вышэйшую адукацыю ў Міжнародным інстытуце працоўных і сацыяльных адносін па спецыяльнасці “Менеджмент”. Рэгулярна прымае ўдзел у раённых, абласных, рэспубліканскіх і міжнародных конкурсах і фестывалях.

​        Гомельская вобласць

        Мілана Урбановіч пачала займацца вакалам з чатырох гадоў. Вучыцца ў СШ №19 г.Гомеля, з’яўляецца салісткай “Студыі 7” пры Гарадскім цэнтры культуры. Марыць спець на адной сцэне з Ірынай Дарафеевай.
Мілана – лаўрэат і дыпламант вакальных конкурсаў і конкурсаў юных піяністаў. З’яўляецца ўладальніцай прэміі спецыяльнага фонду Прэзідэнта Рэспублікі Беларусь па падтрымцы таленавітай моладзі, узнагароджана прэміямі Гомельскага гарвыканкама і аблвыканкама па падтрымцы таленавітай моладзі.
        Вячаслаў Гаршкоў – кіраўнік эстраднай студыі “Музычны лабірынт” у Брагінскім раённым Доме культуры. У 2011 годзе скончыў Гомельскі дзяржаўны каледж мастацтваў імя Н.Ф. Сакалаўскага па класу “Спевы”.
Вячаслаў іграе на гітары, у рэпертуары мае творы ўласнага сачынення. У 2012 годзе на конкурсе маладых выканаўцаў у Маладзечне стаў лаўрэатам ІІІ ступені.
        Данута Швед заняткі музыкай палюбіла ў дзіцячым садку. З 5 гадоў стала ўдзельніцай эстраднага вакальнага калектыву Гарадскога цэнтра культуры, а ў 6 год упершыню выступіла на вакальным конкурсе. Іграе на фартэпіяна. На музычным інструменце выконвае класічныя творы, мелодыі з кінафільмаў і сучасныя песні.
Яе творчая скарбонка мае больш за 40 дыпломаў з розных музычных конкурсаў і фестываляў. Сёння яна выпускніца ДУА “Гімназія г.Жыткавічы імя А.А.Ліхоты”, сакратар БРСМ ўстановы і актыўная ўдзельніца гарадскіх і раённых мерапрыемстваў.

        Гродзенская вобласць

        Валерыя Жэкайла – навучэнка Гродзенскага дзяржаўнага каледжа мастацтваў аддзялення “Мастацтва эстрады (спевы)”. Таленавітая і працавітая дзяўчына, пра што сведчыць выдатная вучоба, дасягнула вялікіх поспехаў на розных вакальных конкурсах. Валерыя смела спрабуе сябе ў самых розных песенных стылях.
       Крысціна Сайко – студэнтка Варшаўскага ўніверсітэта. З маленства праяўляла творчыя здольнасці. Спявачка з’яўляецца нязменнай удзельніцай канцэртаў, што праходзяць на самых прэстыжных эстрадных пляцоўках Гомельшчыны. За сваю творчую дзейнасць была неаднаразова адзначана граматамі, падзячнымі лістамі і памятнымі падарункамі. Вынікам творчай дзейнасці сталі сольныя канцэрты Крысціны.
       Вадзім Лукашэвіч – студэнт 4 курса факультэта музычнага мастацтва “Харавая музыка (акадэмічная)” БДУКіМ. Актыўнае творчае жыццё канкурсанта пачалося са школьных гадоў. Будучы старшакласнікам, арганізаваў і стаў кіраўніком вакальнай групы польскай песні “Mihael” пры касцёле св.Міхаіла Архангела. За плячыма канкурсанта шмат конкурсаў і фестываляў рознага ўзроўню, на якіх ён неаднаразова быў адзначаны дыпломамі пераможцы.

         Мінская вобласць

         Кацярына Лазука – студэнтка 2 курса Беларускага дзяржаўнага ўніверсітэта культуры і мастацтваў. Скончыла Мінскі дзяржаўны каледж мастацтваў па спецыяльнасці “Мастацтва эстрады (спевы)”.
Пастаянная ўдзельніца культурна-масавых мерапрыемстваў установы, горада і раёна. Маладая спявачка з’яўляецца ўладальніцай сертыфікатаў лаўрэата раённых, абласных і рэспубліканскіх конкурсаў. У вольны час займаецца спортам.
        Аляксей Грыневіч вучыўся ў Мінскім дзяржаўным каледжы мастацтваў па спецыяльнасці “Мастацтва эстрады”. З 2012 па 2016 гг. з’яўлялся салістам Акадэмічнага ансамбля Узброеных Сіл Рэспублікі Беларусь. Зараз – саліст Ансамбля памежнай службы Рэспублікі Беларусь. Малады спявак пастаянны ўдзельнік конкурсаў і фестываляў рознага ўзроўню.
        Вольга Булай – навучэнка Мінскага дзяржаўнага каледжа мастацтваў па спецыяльнасці “Мастацтва эстрады (спевы)”. Актыўна ўдзельнічае ў канцэртным жыцці каледжа, у прафарыентацыйных канцэртах, а таксама ў раённых, гарадскіх і рэспубліканскіх мерапрыемствах.
У 2016 годзе Вольга прымала ўдзел у знакавым канцэрце “Маладзечна – культурная сталіца Беларусі”, стала стыпендыятам спецыяльнага фонду Прэзідэнта Рэспублікі Беларусь па падтрымцы таленавітай моладзі.

         Мінск

        Вадзім Авіжыч – студэнт факультэта мастацтваў па спецыяльнасці “Мастацтва эстрады (спевы)” Інстытута сучасных ведаў імя А.М Шырокава. Канкурсант валодае прыгожым голасам і акцёрскім майстэрствам.
Прымае актыўны ўдзел ва ўсіх сацыяльных мерапрыемствах і праграмах, якія праводзяць інстытут і адміністрацыя Першамайскага раёна г. Мінска. Канцэртная дзейнасць спевака і яго ўклад ва ўкараненне моладзевых творчых праектаў адзначаны падзякамі кіраўніцтва інстытута і адміністрацыі Першамайскага раёна г.Мінска.
         Андрэй Апонік вучыцца ў магістратуры Інстытута сучасных ведаў імя А.М Шырокава па спецыяльнасці “Прадзюсарства ў сферы мастацтва”. Ён актывіст ПАГА “БРСМ” і штогод арганізоўвае акцыю “Будзь з намі, накіраваную на павышэнне іміджавай прывабнасці БРСМ”. Андрэй узнагароджаны прэміяй Мінгарвыканкама за ўклад у культурнае і навуковае жыццё сталіцы, падзякамі кіраўніцтва інстытута і адміністрацыі Першамайскага раёна г.Мінска. 

        Дарья Хмяльніцкая – артыстка духавога аркестра Мінскага гарадскога ўпраўлення МНС, выкладчык кафедры мастацтва эстрады БДУКіМ.У першы раз выйшла на сцэну ва ўзросце 4 гадоў. У 2016 годзе з адзнакай скончыла Беларускі дзяржаўны ўніверсітэт культуры і мастацтваў па спецыяльнасці “Мастацтва эстрады (спевы)”. Зараз вучыцца ў магістратуры БДУКіМ па спецыяльнасці “Мастацтвазнаўства”.Штогод з’яўляецца ўдзельніцай урадавых канцэртаў, а таксама рэспубліканскага і міжнароднага значэння. Дарья – дыпламант спецыяльнага фонду Прэзідэнта Рэспублікі Беларусь па падтрымцы таленавітай моладзі.

        Магілёўская вобласць

        Ганна Трубяцкая першыя крокі па сцэне дзяўчына зрабіла ў 6 гадоў. Сёння яна студэнтка 4 курса Магілёўскага дзяржаўнага каледжа мастацтваў па спецыяльнасці “Мастацтва эстрады (спевы)”.
Канкурсантка прымае актыўны ўдзел у гарадскіх, абласных і рэспублікаскіх мерапрыемствах. Ганна з’яўляецца салісткай гарадскога духоўнага аркестра і знаходзіцца ў пастаяным творчым пошуку.
       Аляксандр Малашэнка першыя крокі па сцэне ў якасці выканаўцы зрабіў у тры гады. У 2013 годзе паступіў у Магілёўскі дзяржаўны каледж мастацтваў на спецыяльнасць “Мастацтва эстрады (спевы)”.
Малады чалавек штогод прымае ўдзел у гарадскіх і абласных мерапрыемствах і конкурсах. У 2016 годзе прымаў удзел у Нацыянальным конкурсе маладых ваканаўцаў беларускай эстраднай песні.
       Дар’я Правашынская пачала свой творчы шлях у сярэдняй школе. Зараз дзяўчына з’яўляецца студэнткай Магілёўскага дзяржаўнага каледжа мастацтваў па спецыяльнасці “Мастацтва эстрады (спевы)”. З першага курса прымае актыўны ўдзел у культурным жыцці ўстановы, а таксама ў гарадскіх, абласных і рэспубліканскіх мерапрыемствах і канцэртах.

Вярнуцца да спiса навiн